Fréttatilkynning

Halaleikhópurinn vinnur nú hörðum höndum að uppfærslu sinni á verkinu ,,Góðverkin kalla!“ eftir þá Ármann Guðmundsson, Sævar Sigurgeirsson og Þorgeir Tryggvason, en allir eru þeir meðlimir Ljótu Hálfvitanna og ekki er þetta í fyrsta skipti þar sem meðlimir þeirra sveitar koma að uppsetningu leikverka fyrir Halaleikhópinn með einhverjum hætti. Þess má til gamans geta að leikstjórar þetta leikárið eru að þessu sinni tveir, þau Oddur Bjarni Þorkelsson meðlimur Ljótu Hálfvitanna og Margrét Sverrisdóttir.

Stefnt er að frumsýningu 4. febrúar. Góðverkin kalla! er gamanleikrit sem gerist á Gjaldeyri við Ystunöf þar sem lífið snýst um góðverk. Allir sem ekki hafa tapað glórunni, lifa fyrir starfsemi góðgerðafélaga sem eru mörg á Gjaldeyri við Ystunöf. Segja má frá því að ný hjúkrunarkona kemur til bæjarins, og er tekið opnum örmum af ýmsum íbúum sveitarfélagsins. Sjúkrahúsið á afmæli og það þarf að finna veglega gjöf handa því, a.m.k. veglegri en það sem hin félögin gefa.

Leikstýrin, þau Oddur og Margrét eru bæði vel menntuð á sviði leiklistarinnar en þau lærðu í Bretlandi. Hún sem leikkona og hann sem leikstjóri. Þau hafa meðal annars starfað með leikhópnum Kláusi og leikstýrt saman víða um landið sem og leikið. Upp á síðkastið hefur Margrét sem dæmi leikið í Heilsugæslunni með Kómedíuleikhúshópnum. Einnig hefur hún farið um víðann völl með Bólu – Hjálmar en sú sýning hlaut Grímu – verðlaunin. Oddur Bjarni hefur hinsvegar bæði leikstýrt, aðstoðarleikstýrt sem og leikið í Borgarleikhúsinu og Þjóðleikhúsinu. Hann hefur einnig verið ötull í starfi áhugaleikhópa og sett upp á þriðja tug sýninga.

Fyrsti samlestur á Góðverkin kalla!

Leiklistarnámskeið í fullum gangi

Margrét Sverrisdóttir og Oddur Bjarni Þorkelsson leikstjórar		Frá félagsfundi 2. okt. 2010
Nú er hafið námskeið hjá Halaleikhópnum með yfirskriftinni Hvernig skapar maður persónu? Námskeiðið er hugsað til að hrista saman leikhópinn og búa undir vinnu vetrarins. Þátttakendur verða síðan leiddir gegnum æfingar og aðferðir við að skapa persónur, bæði frá grunni og eftir handriti. Farið verður í raddbeitingu, notkun á leikmunum, líkamsbeitingu og búningum. Metþátttaka er á námskeiðinu. Í byrjun nóvember verður svo hafist handa við að setja upp Góðverkin kalla! eftir þá Þorgeir Tryggason, Sævar Sigurgeirsson og Ármann Guðmundsson. Í leikstjórn þeirra Odds Bjarna Þorkelssonar og Margrétar Sverrisdóttur. Fyrsti samlestur verður auglýstur hér á síðunni. Fyrirkomulag æfingatímabilsins verður svipað og síðustu ár. Góðverkin kalla! er gamanleikrit sem gerist á Gjaldeyri við Ystunöf þar sem lífið snýst um góðverk. Allir sem ekki hafa tapað glórunni, lifa fyrir starfsemi góðgerðafélaga sem eru mörg á Gjaldeyri við Ystunöf. Segja má frá því að ný hjúkrunarkona kemur til bæjarins, og er tekið opnum örmum af ýmsum íbúum sveitarfélagsins. Sjúkrahúsið á afmæli og það þarf að finna veglega gjöf handa því, a.m.k. veglegri en það sem hin félögin gefa.

Félagsfundur og partý 2. okt. kl. 20.00

Laugardaginn 2. okt. nk. verður félagsfundur í Halanum, Hátúni 12. Kl. 20.00

Dagskrá:

• Kosning fundarstjóra og fundarritara
• Nýir leikstjórar Oddur Bjarni Þorkelsson og Margrét Sverrisdóttir kynna sig
• Leiklistarnámskeið kynnt
• Leikrit vetrarins “Góðverkin kalla„ kynnt
• Önnur mál

Að loknum félagsfundinum verður svo Halapartý með hefðbundnu sniði.

Nýir félagar eru velkomnir

Leiklistar námskeið

Með yfirskriftinni Hvernig skapar maður persónu?
Námskeið til að hrista saman leikhópinn og búa undir vinnu vetrarins. Þátttakendur verða síðan leiddir gegnum æfingar og aðferðir við að skapa persónur, bæði frá grunni og eftir handriti. Farið verður í raddbeitingu, notkun á leikmunum, líkamsbeitingu og búningum. Einu skilyrðin eru að þáttakendur mæti óundirbúnir og tilbúnir að leika sér og hafa gaman. Nánar kynnt á félagsfundinum.

Námskeiðið hefst 20. okt. og stendur í 2 vikur eða 20 tíma alls. Verð kr. 3000 fyrir skuldlausa félagsmenn en 6000 kr. fyrir aðra. Allir velkomnir. Skráning á This email address is being protected from spambots. You need JavaScript enabled to view it. eða í síma 897-5007

Útsending Halafrétta

Vetrarstarfið að hefjast

Í gær var skrifað undir samninga við 2 leikstjóra sem ætla að vinna með okkur í vetur. Það eru þau Oddur Bjarni Þorkelsson og Margrét Sverrisdóttir. Ætlunin er að halda leiklistarnámskeið seinni partinn í október þar sem farið verður í karaktersköpun. Stóra verkefni vetrarins verður svo Góðverkin kalla eftir þríeykið Ármann Guðmundsson, Þorgeir Tryggvason og Sævar Sigurgeirsson. Æfingar hefjast í nóvember, svo verður tekið frí í desember og æft í janúar. Stefnt að frumsýningu í byrjun febrúar. Félagsfundur verður í byrjun október og partý :-) Allt verður þetta auglýst nánar á næstu dögum.

HALADAGUR Í KRIKA - Pikknikk og leikir

Laugardaginn 3. júlí nk. ætlum við að hafa Haladag í Krika við Elliðavatn. Undanfarin ár höfum við hist reglulega í sumarhúsi Sjálfsbjargar og skemmt okkur við leiklestur, grill, söng og ýmislegt fleira. Öll skemmtiatriði eru velkomin, stjórn kemur með einhver stuttverk úr kassanum góða til að leiklesa. Ef þið lumið á stuttverkum þá endilega komið með þau. Við stefnum á að hittast um kl. 14.00 og láta svo bara dagskrána ráðast af þeim sem mæta.

Seinni partinn drögum við fram grillið og borðum saman. Hver og einn kemur með á grillið fyrir sig og svo hjálpumst við bara að, en líka er hægt að kaupa pylsur til að grilla í Krikanum og gos. Ath. að það er ekki posi í Krika. Söngolíu koma þeir svo með sem vilja. Opið verður eins lengi og stemmingin verður góð. Ekki er verra ef fólk mætir í búningum og með hljóðfæri

Kriki stendur við Elliðahvammsveg. Þegar keyrt er upp Breiðholtsbrautina er farið fram hjá Fellahverfinu og áfram og beygt inn á Vatnsendaveg hjá Hestar og menn, þar er keyrt eftir honum eins og hann liggur í hlykkjum og þegar komið er að hringtorgi no. 3, þessu með stuðlabergssteinunum er beygt þar niður sem stendur Elliðahvammur. Sá vegur er keyrður eins langt og malbikið nær og aðeins lengra yfir smá þvottabrettishæð, þá birtist á vinstri hlið hvítt hús með sólpalli í kring, Þá ertu komin í Krikann. Strætó nr. 28 stoppar við hringtorgið, þaðan er um 700 m. gangur.

Á www.kriki.bloggar.is má sjá nánari leiðarlýsingu og ýmislegt um Krika. Allir velkomnir og takið með ykkur gesti

INNHEIMTA FÉLAGSGJALDA:

DVD diskar

Enn hefur ekki unnist tími til að fara í gegnum eldir DVD diska en stjórn er með það á verkefnaskrá sinni að ljúka þeirri vinnu. Því biðjum við félagsmenn sem vantar inní safnið að sýna smá biðlund enn, við ætlum að taka okkur sumarfrí eftir annasamt leikár en förum í þetta með haustinu.

En það eru tilbúnir DVD diskar af því sem var gert síðasta leikár

Hægt er að panta þá hjá gjaldkera This email address is being protected from spambots. You need JavaScript enabled to view it. og greiða inná reikning no. 0546 – 14 – 600440 og kennitalan er 421192-2279, munið að setja kennitölu ykkar og hvaða disk verið er að borga fyrir í skýringarreitinn. Diskarnir kosta: Haustleikarnir 1200 kr. Sjöundá 2000 kr. og Vorhristingur 1200 kr. Kristín ætlar að afhenda þá diska sem búið er að greiða fyrir í Halanum fimmtudaginn 8. júlí. Milli 18.00 og 20.00. Vakin er athygli á því að nú eins og undanfarin ár mun allur ágóði af sölu diskanna renna í Steindórssjóð sem er sjóður sem er notaður til að byggja upp ljósa og tækni deildina okkar.

Hanna Margrét Kristleifsdóttir nýr formaður

Á aðalfundi 20. maí sl. var Hanna Margrét Kristleifsdóttir kosin formaður Halaleikhópsins, Ása Hildur Guðjónsdóttir var kosin ritari, Guðríður Ólafsdóttir var kosin meðstjórnandi og Þröstur Jónsson var kosinn 1. varamaður. Stjórn vill þakka fráfarandi stjórn fyrir vel unnin störf.

Á fyrsta fundi nýrrar stjórnar þar sem var farið yfir stöðu mála var meðal annars ákveðið að hafa tiltektardag í Halanum fimmtudaginn 3. júní kl. 17.00 og fram eftir kvöldi.

Einnig var ákveðið að hafa tvo Haladaga í Krika í sumar þann fyrri laugardaginn 3. júlí nk. og stefnt að því að halda hinn seinni líklega 21. ágúst. Það verður auglýst nánar þegar nær líður.

Núverandi stjórn :

	Formaður	Hanna Margrét Kristleifsdóttir
	Varaformaður	Höskuldur Höskuldsson
	Gjaldkeri	Kristín M. Bjarnadóttir
	Ritari	Ása Hildur Guðjónsdóttir
	Meðstjórnandi	Guðríður Ólafsdóttir
	Varamaður 1	Þröstur Jónsson
	Varamaður 2	Einar Andrésson
	Varamaður 3	Elísa Ósk Halldórsdóttir
	Skoðunarmenn reikninga:
		Grétar Pétur Geirsson
		Kristín R. Magnúsdóttir

Dagskrá aðalfundar skv. lögum félagsins:

1. Kosning fundarstjóra og fundarritara.
2. Inntaka nýrra félaga.
3. Skýrsla stjórnar.
4. Afgreiddir endurskoðaðir reikningar félagsins.
5. Afgreiðsla tillagna sem borist hafa fundinum, svo sem lagabreytingar.
6. Starfsemi næsta leikárs.
7. Kosning stjórnar, varastjórnar, tveir skoðunarmenn reikninga.
8. Önnur mál

Núverandi stjórn :

Því þarf að kjósa um formann, ritara, meðstjórnanda og einn varamann.

Því er auglýst eftir framboðum í eftirfarandi embætti:

Formann til tveggja ára.
Ritara til tveggja ára
Meðstjórnanda til tveggja ára
Varamann til tveggja ára

Skv. lögum félagsins geta allir fullgildir félagsmenn gefið kost á sér í þessi embætti á fundinum.
Nú er kjörið tækifæri fyrir nýtt fólk að gefa kost á sér í stjórn. Lög félagsins má finna á vefnum okkar www.halaleikhopurinn.is/log.htm

Þankaroksfundur

Nú er sýningum á hinni margrómuðu Sjöundá lokið og tími til að huga að næstu skrefum. Ákveðið var að boða til fundar þar sem félagsmenn geta komið hugmyndum sínum á framfæri við stjórn.

Í lokahófi Sjöundár komu fram sterkar tillögur um að halda fjáröflunar Kaffileikhús í vor. Ekki veitir af að hala inn peningum ef félagsmenn eru til í það. Einnig þarf að huga að næsta leikári, hvað viljum við gera, hvernig verk, hvaða leikstjóra og svo framvegis.

Þetta er frábært tækifæri til að koma handritum á framfæri og láta leiklesa td. Flott að fá að spreyta sig í leikstjórn, taka fyrstu skrefin á sviðinu, lýsa sýningu, hanna búninga, halda utan um verkefni, sinna kynningarmálum, flytja tónlist, ljóð, gjörning, uppistand eða hvaðeina sem félagsmenn eru að bauka.

Ljóst er að við förum ekki af stað með undirbúning undir Kaffileikhús nema manna fyrirfram alla pósta, leikstjórn, handrit, ljós, búninga, förðun, kynningarmál, og svo má lengi telja. Því er mikilvægt að sem flestir komi á fundinn og leggi í púkk hugmyndir fyrir stjórn að vinna eftir. Dagsetning yrði þá 8. og 9. maí eða 14. og 15. maí.

Einnig kom upp hugmynd um að halda Eurovision partý, gaman væri að heyra hvort áhugi er fyrir því líka. Lokakeppnin verður 29. maí. Og ýmislegt fleira má eflaust gera.

Sjáumst hress á mánudaginn og munið að við tökum við flöskum og dósum í sjóðinn okkar. Í þetta sinn verður fundarboðið bara sentí tölvupósti og birt hér svo endileg látið þetta berast og smalið á þankaroksfundinn.

Nýjir félagar eru velkomnir.

Alþjóðlegi leiklistardagurinn 27. mars

Ávörp á Alþjóðlega leiklistardeginum 27. mars

Leiklistarsamband Íslands hefur ávallt fengið íslenskan leikhúslistamann til að semja sérstakt ávarp í tilefni Alþjóðlega leiklistardagsins. Hefur sú hefð skapast að það hafi verið flutt af höfundi í útvarpi þann dag, sem og af stóra sviði Þjóðleikhússins fyrir sýningu. Þá hafa leikhúslistamenn um allt land stigið fram fyrir tjöld leikhúsa sinna og flutt ávarpið íslenska þetta kvöld. Ávarpið semur að þessu sinni Ragnheiður Skúladóttir, deildarforseti leiklistar- og dansdeildar Listaháskóla Íslands.

Frá árinu 1962 hefur Alþjóðlegi leiklistardagurinn verið haldinn hátíðlegur um allan heim. Þá hefur heimskunnur leikhúslistamaður verið fenginn til að semja ávarp í tilefni dagsins af Alþjóða leiklistarstofnuninni, ITI, sem hefur aðsetur í Unesco-byggingunni í París. Að þessu sinni er það Dame Judy Dench leikkona.

Íslenska ávarpið:

Er það ekki merkilegt að í samfélagi okkar, þar sem hinn svokallaði hvunndagur glottir við manni að morgni og æpir: „IceSave“! eða: „Eldgos“! ... já, er það ekki merkilegt að í okkar daglega amstri; þéttriðnu neti upplýsinga, álitamála, greinargerða, fésbókarfærslna, tölvuskeyta og smáskilaboða ... skuli leynast leiksvið?

Er það ekki undarlegt að við, sem reynum eftir fremsta megni að halda okkur í sömu vídd og okkur var úthlutað við fæðingu, skulum sammælast um að kóróna raunveruleikann með leikhúsum, sem eru til þess eins gerð að hýsa skáldlega úttekt á þeim flóknu og oft tröllvöxnu sendingum sem tíminn þeytir í átt til okkar hvort heldur sem er í vöku eða í draumi? Eða hvað?

Við tölum um leiklist og eigum með því við athafnirnar sem áhorfendur verða vitni að í leikhúsi. Þó á leiklistin sér ekki aðrar forsendur en skynjun og túlkun áhorfandans á hreyfingum og orðum þeirra sem standa á sviðinu í hvert sinn. Vegna þess að leiklistin er í raun átak áhorfenda og leikenda. Kjarni hennar felst í samkomulagi beggja aðila um að gera tilraun til þess að skapa sameiginlega reynslu, án þess að hafa nokkra tryggingu fyrir því að tilraunin takist, enda upplifun áhorfenda af atvikum á leiksviði – sjónarhorn og afstaða – bundin persónu þeirra og lífsreynslu. En þegar tilraunin ber árangur – og það gerist vissulega stundum – þá gerast lítil kraftaverk. Það sem virtist svo órætt og óljóst breytist í allt að því áþreifanlega staðreynd.

Þá skilur maður loks að ástæða þess að við höfum sammælst um að hafa sérstök leiksvið, leikhús og skapa leiklist er sú að það er í eðli okkar að vilja túlka veruleikann í kringum okkur og upplifun okkar af honum. Við höfum þörf fyrir að líta um öxl, endurmeta stöðu okkar, gagnrýna gjörðir okkar og hegðun og við þráum að setja flókna og – að því er virðist – fullkomlega óskylda hluti í samhengi. Til þess að skilja það sem sýnist óskiljanlegt.

Alheimsávarpið:

Alþjóða leiklistardagurinn gefur okkur tækifæri til að fagna leiklist eins og hún birtist okkur í ógrynni mynda.
 Leiklist er uppsprettulind skemmtunar og andagiftar og gefur færi á að sameina ólíkar menningararfleifðir og þjóðir sem fyrirfinnast vítt og breitt um heiminn. En leiklist er líka meira en það, því með leiklistinni gefst tækifæri til að fræða og upplýsa.

Leiklist er flutt víðsvegar um heiminn og ekki alltaf í hefðbundnum leikhúsbyggingum. Leiksýning getur birst okkur í litlu þorpi í Afríku, í skjóli fjalls í Armeníu, á agnarsmárri eyju í Kyrrahafinu. Allt sem þarf er rými og áhorfendur. 
Leiklist kallar fram bros á andlitum okkar, fær okkur til að tárast, en ekki síst fær hún okkur til að hugsa og bregðast við.

Leiklist verður til í samvinnu. Leikararnir eru þeir sem sjást, en þeir eru undra margir sem ekki sjást og eru allir jafn mikilvægir og leikararnir. Það munar um þá og fyrir hæfileika þeirra verður leiksýning að veruleika. Þeir eiga líka allan heiður skilinn þegar við fögnum og gleðjumst yfir þeim sigrum sem leiklistin vonandi skilar í höfn í dagslok.

27. mars er hinn opinberi alþjóðadagur leiklistarinnar. Hver dagur ársins ætti skilið að vera sá dagur; dagur leiklistarinnar. Því það er á okkar ábyrgð að viðhalda stöðugt hefðinni að skemmta, að fræða og upplýsa áhorfendur okkar, þá sem öll okkar tilvist byggir á.

Íslensk þýðing: Viðar Eggertsson.

Höfundur ávarps Alþjóða leiklistardagsins í ár er ein af virtustu og dáðustu leikkonum Bretlands, Dame Judith Olivia Dench, betur þekkt sem Judi Dench. Hún hefur borið hróður bresks leikhús um álfur heims og hlotið margvíslegar viðurkenningar og verðlaun fyrir list sína á leiksviði, í sjónvarpi og kvikmyndum. Árið 1988 var hún öðluð af Englandsdrottningu og hlaut þá nafnbótina Lafði breska konungríkisins. Hún hefur hlotið tíu BAFTA verðlaun, Laurence Olivier verðlaunin sjö sinnum, tvisvar sinnum Screen Actors Guild verðlaunin, tvenn Golden Glope verðlaun, Tony verðlaun og Óskarsverðlaun fyrir list sína

Steinunn Sveinsdóttir kvödd

Fyrir lokasýningu á Sjöundá fór hópur leikara að kveðja Steinunni Sveinsdóttur í Hólavallakirkjugarði og þakka henni fyrir. Við færðum henni rósir og sungum sálminn úr leikritinu.

Ef þig, manneskjan, mæðir.

Ef þið manneskjan, mæðir mótlætisbára,
Djöfull og heljan hræðir með hugraun sára.
Jesús gjörvalla græðir, guðs orð best þar um
Ræðir með kraptinn klára

Sjöundá - Svartfugl Gunnars Gunnarssonar

Sýningum á Sjöundá er lokið, sýningar urðu 12

Allra síðasta sýning:

Félagsfundur

Miðvikudaginn 10. mars 2010, kl. 20.00 í Halanum.

Bandalagsskólinn flytur!

Leiklistarskóli Bandalags íslenskra leikfélaga verður ekki í Svarfaðardalnum næsta sumar. Við erum búin að leita árum saman að stað sem hefur betra aðgengi fyrir fatlaða en kostar ekki mikið meira en Húsabakki og síðasta ráðið var að auglýsa hjá öllum sveitarfélögunum á landinu. Okkur bárust fjölmörg svör en aðeins eitt mætti okkar kröfum að mestu. Það var frá Húnavallaskóla í Húnavatnshreppi. Þið getið skoðað aðstöðuna á vefslóðinni http://www.hotelhunavellir.is/

Í sumar er áformað að halda þrjú námskeið að Húnavöllum dagana 12. til 20. júní; Leikstjórn I, kennari Sigrún Valbergsdóttir, Leiklist I, kennari Ágústa Skúladóttir og framhald af söngnámskeiðinu frá síðasta sumri, Röddin í leikhúsinu, kennari Þórhildur Örvarsdóttir. Skólabæklingurinn verður sendur út eins og venjulega þann 8. mars, 10 eintök til hvers félags (formanns) og hefjast skráningar þann 15. mars. Þeim lýkur 15. apríl að venju.

Það verður spennandi að hefja skólastarfið á nýjum stað þótt eftirsjá sé að Svarvaðardalnum og fólkinu þar sem hefur verið okkur ómetanlegt öll þessi 13 ár.

Sjöundá hlýtur góða dóma

Uppfærsla Halaleikhópsins á ,,Sjöundá – Svartfugl Gunnars Gunnarssonar“ hefur fengið mjög góðar móttökur. Óhætt er að segja að áhorfendur voru mjög ánægðir með sýninguna og túlkun leikhópsins á sögunni.