Kirsuberjagarðurinn

Gamanleikur í fjórum þáttum eftir Anton Pavlovitsj Tsjekhov
Þýðandi úr rússnesku: Eyvindur Erlendsson
Leikstjóri: Guðjón Sigvaldason
Frumsýnt var 4. mars 2005

Kirsuberjagarðurinn er leikrit um fjölskyldu, sem er að missa ættaróðalið, vegna skulda.

Óðalsfrúin heldur sínu striki og lifir hátt, eyðir í ferðalög og alls kyns óþarfa. Heldur þjónustufólk, sem er duglegt að borða, þótt fæðið sé dýrt t.d. á veitingahúsum.

Kirsuberjatrén eru orðin gömul og berin þroskast seint og illa, sem kemur kannski ekki að sök, því enginn kaupir þau.

Allt húsið er í niðurníðslu, því engir peningar eru til að halda því við.

Þetta atriði gerist í sjálfum Kirsuberjagarðinum, Kristinn Sigurjónsson, Hanna Margrét Kristleifsdóttir, Sóley B. Axelsdóttir, María Jónsdóttir, Árni Salomonsson og Gunnar Gunnarsson í hlutverkum sínum

Höfundurinn

Anton Tsjekhov (1860-1904) vakti fyrst athygli sem smásagnahöfundur, en eftir því sem leið á ævina, snéri hann sér í auknum mæli að leikritun. Á síðustu æviárum sínum skrifaði hann fjögur leikrit, sem teljast til meistaraverka leikbókmenntanna: Mávinn, Vanja frænda, Þrjár systur og Kirsuberjagarðinn, sem öll hafa verið af og til á fjölum leikhúsa um allan heim.

Tsjekhov var þriðji í röð sex systkina í fremur efnalítilli fjölskyldu. Faðir hans rak litla búð í bænum Taganrog í Rússlandi, en varð gjaldþrota þegar sonurinn var sextán ára. Fjölskyldan tók sig upp og flutti til Moskvu en Tsjekhov varð eftir í Taganrog til að ljúka menntaskólanámi og varð að sjá
fyrir sér sjálfur.

Hann lauk  embættisprófi í læknisfræði frá Moskvuháskóla árið 1884.

Tsjekhov skrifaði meðfram læknisstörfum, en þau gáfu honum færi á að kynnast rússnesku þjóðinni og höfðu áreiðanlega mikil áhrif á hann sem rithöfund. Síðustu 10 ár ævi sinnar sinnti hann eingöngu ritstörfum.

Leikrit Tsjekhovs kröfðust leiktúlkunar, sem var gjörólík þeim ýkjukennda leikstíl sem tíðkaðist í leikhúsum Moskvuborgar á þeim tíma og hlutu litla athygli, þar til Mávurinn var settur upp.

Tsjekhov var heilsuveill síðustu ár ævi sinnar og lést úr berklum, sex mánuðum eftir frumsýningu á síðasta leikriti sínu, Kirsuberjagarðinum.

Persónur og leikendur

Annað

Um leikstjórann:

Guðjón Sigvaldason útskrifaðist frá Mountview Theatre School í Bretlandi 1987. Hann starfaði fyrstu árin jafnt sem leikari og leikstjóri, en hefur hin síðari ár nær eingöngu starfað sem leikstjóri, jafnframt því að skrifa en eftir hann hafa verið sýnd ýmis leikrit, auk þess að hann hefur gefið út þrjár ljóðabækur og skáldsöguna Ungfolahroka. Hann hefur aðallega starfað með áhugaleikfélögunum og sjálfstæðu leikhópunum, auk þess að stjórna götuleikhópum víðsvegar um landið. En sýningar hans þykja oft bera keim af götuleikforminu.

Hann hefur sett á svið á fimmta tug leiksýninga, víðs vegar um landið, t.d. Djöflaeyjuna bæði á Hornafirði og Siglufirði, Ég er hættur farinn, ég er ekki með í svona asnalegu leikriti, Önnu Frank og Rocky Horror á Egilsstöðum, Stræti, Bugsy Malone, Hróa Hött, Bangsímon, Kardimommubæinn, Bróðir minn Ljónshjarta, Emil í Kattholti, Í Tívolí, Grease, Svartklædda Konan, og Oliver! svo eitthvað sé nefnt.

Kirsuberjagarðurinn er annað leikritið sem hann setur upp með Halaleikhópnum en hann leikstýrði Fílamanninum sem hópurinn flutti á seinasta ári.

Styrktaraðilar Kirsuberjagarðsins:

Sérstakar þakkir fá:

Halaleikhópurinn þakkar öllum, sem hafa lagt honum lið við að koma upp þessari sýningu.

Sérstakar þakkir til maka og nánustu aðstandenda fyrir þolinmæðina á tímabilinu.